Suporta sang Capiceños para sa early registration ginpanawagan

SYUDAD SANG ROXAS, Capiz, Enero 25 (PIA6) -- Ginpanawagan sang mga opisyal sang Department of Education diri sa Capiz ang suporta sang mga pumoluyo kag mga opisyal sang kabarangayan para sa pagsugod sang early registration para sa mga estudyante sa masunod nga pagbukas sang klase.

Suno kay Roxas City Schools Division Superintendent Miguel Mac Aposin nga ang nasambit nga early registration ang magasugod sa Enero 26, Sabado, sa diin bukas ang tanan nga pampubliko nga mga buluthuan para sa paglista sang mga estudyante.

Angot man diri, ginapanawagan ni Aposin ang suporta sang mga ginikanan pinaagi sa pagpalista sang ila kabataan nga maga kindergarten, Grade I ukon Grade 7 sa pagbukas sang klase sa maabot nga Hunyo.

Nagapangayo man sila sang bulig para ma-enrol liwat ang mga kabataan nga nag-untat sa pag-eskwela kag makabalik kag makatapos sang ila pagtuon.

Tinutuyo sang temprano nga pagpanglista sang kabataan nga mahibaluan ang kadamuon sang mga estudyante para mahandaan sang DepEd ang mga kinahanglanon sang mga buluthuan ilabi na sa bahin sang mga classroom, libro, pulungkuan kag iban pa.

Ginpahayag naman ni Capiz DepEd Division Superintendent Eveleth Gamboa nga nakapadala na siya sang mga direktiba sa tanan nga mga district supervisors, mga prinsipal kag mga manunudlo sa elementarya kag high school sa bug-os nga probinsya sa paghanda para sa pagsugod snag early registration.

Suno man kay Gamboa nga sumugod sa Enero 26, magatayuyon na tubtub sa pagbukas sang klase sa Hunyo ang ila paglista sang mga estudyante para mapasiguro nga yara sa mga eskwelahan ang mga kabataan .

Suno pa sa iya nga kabahin sa ila kampanya ang pagpakighinun-anon sa mga opisyales sang kabarangayan kag ang pagpamalay-balay agud malab-ot ang mga kabataan. (PIA/Jemin B. Guillermo)