SYUDAD SANG ROXAS, Capiz, Enero 26 (PIA6) – Nagpanawagan ang PhilHealth sa mga Capiceños para suportahan ang hilikuton sang amo nga ahensya para malab-ot sang pungsod ang handom sa paghatag sang maayo nga lawas para sa tanan ukon ang universal health care.
Ginpahayag ni Capiz PhilHealth Information Officer Mary Jane Amigo nga kinahanglanon ang suporta sang tanan lakip na sang mga Capiceños para mahatag sang gobyerno sa mga pumoluyo ang dekalidad nga serbisyo sa ikaayong-lawas.
Partikular nga ginapangayuan ni Amigo sang suporta ang palaabuton nga PhilHealth Run 2013: The Nationwide Run for Mother and Child Protection angot sa pagsaulog sang ika-18 nga anibersaryo sang amo nga ahensya sa maabot nga bulan sang Pebrero.
Ang amo nga hilikuton ang dululungan nga dalagan nga hiwaton sa 18 ka mga mayor nga syudad sa Pilipinas.
Para sa Rehiyon 6, ang dalagan ang patigayunon sa Syudad sang Iloilo sa Pebrero 17 nga magasugod 4:30 sa aga, sa diin ginapanan-aw nga nilibo ang magapasakup diri.
Tinutuyo man sang amo nga hilikuton nga makatipon sang pundo para sa programa sa paghatag sang libre nga health insurance sa mga imol lakip na ang pagbulig sa mga pasyente sa kanser sang Philippine Children Medical Center kag sang Kaibigan ng mga Kabataang may Kanser.
Sa mga interesado nga mga lokal nga pamunuan, pribado kag pampubliko nga mga talatapan, pribado nga indibidwal lakip na sang mga non-government kag civic organization nga luyag maghatag sang ila donasyon ukon pinansyal nga bulig, sarang nila mahatag ang mga ini pinaagi sa talatapan sang PhilHealth diri sa probinsya sang Capiz. (PIA/Jemin B. Guillermo)
Linggo, Pebrero 3, 2013
Mag-subscribe sa:
I-post ang Mga Komento (Atom)
