Suporta para sa survey sa agrikultura ginpanawagan

SYUDAD SANG ROXAS, Capiz, Marso 11 (PIA6) – Nagpanawagan sang suporta ang National Statistics Office sang Capiz ang mga pumoluyo para sa nagapadayon nga survey tuhoy sa agrikultura kag pangisda.

Ginpahayag ni Capiz NSO provincial head Frankie Dordas nga pinaagi sa paghatag sang husto kag kompleto nga sabat sa mga palamangkutanon nga amo nga survey, lubos nga mahibaluan ang igsakto nga datus nga pagagamiton sa pagdihon sang mga polisa kag programa.

Suno kay Dordas nga kapin sa 654 tanan ang ginkuha sang ila talatapan para sa pagpatigayon sang Census on Agriculture and Fisheries ukon CAF, sa diin, 438 sa mga ini ang mga enumerators ka gang 216 ang mga team supervisors.

Suno man sa iya nga ang amo nga survey nga ginapatigayon sa tanan nga kabarangayan sa Pilipinas ang nagsugod na sang Pebrero 25 kag magatapos sa Abril sini nga tuig.

Sa karon, suno man sa kiya, nagapadayon ang pagpanglista sang mga panimalay kag survey sa mga agricultural, aquacultural kag fishery operators sa Capiz.

Ginpahayag man ni Dordas nga bangud sa pagka importante nga ma kompleto ang mga kinahanglanon nga impormasyon kag datus, nagpagwa man sang direktiba si Department of the Interior and Local Government Secretary Mar Roxas para sa tanan nga mga gobernador, alkalde, barangay kapitan lakip na sa mga opisyales sang amo nga ahensya sa paghatag sang nagakaigo nga suporta para mangin madinalag-on ang amo nga hilikuton. (PIA/Jemin B. Guillermo)

Read more...

BJMP nagpanawagan sa publiko nga mangin katuwang sa pagpaayo sang mga priso

SYUDAD SANG ROXAS, Capiz, Pebrero 19 (PIA6) – Ginpanawagan sang Bureau of Jail Management and Penology ang publiko nga mangin katuwang sa pagbag-o kag pag-uswag sang mga priso.

Suno kay Roxas City BJMP Warden Jairus Anthony Dogelio nga daku ang papel sang mga pamilya sang tagsa ka priso lakip na ang kumonidad sa pagbag-o kag pagpaayo sang kabuhi sang mga ini agud mangin produktibo nga mga katapu sang sosyedad.

Suno sa iya nga indi tanan nga mga napriso ang malain apang mahimo nga bangud sa mga sirkumstansya natulod sila sa paghimo sang krimen.

Gin-apela man ni Dogelio sa publiko ang paghangop sa baylo sang diskriminasyon para sa mga ini .

Ginpaathag man niya nga kabahin sang ila mga hilikuton sa BJMP sa karon ang pagtudlo sa mga priso sang ihibalo kag teknolohiya kag paghatag sang pangabuhian subong sang pag-obra sang hollow blocks, kandila, handicraft kag wood craft nga nagadugang kita para igahatag sang mga ini sa ila tagsa ka pamilya.

Bilang suporta man sa ordinansa sang Syudad sang Roxas nga nagadumili sa paggamit sang plastic, magahimo man sila sang mga paper bag ukon supot para man sa ila dugang nga kita kag pangabuhian.

Maluwas sini, padayon man ang pagpatigayon sang ila mga hilikuton subong sang regular nga pag-ehersisyo, pagtuon, paralegal nga serbisyo sang BJMP para sa ila mga priso nga may ara pa nga naka-pending nga kaso, kag madamo pa nga iban.

Sining karon lang, suno man kay Dogelio, kapin sa 68 ka mga nakahunong sa ila prisohan ang natigayon nga makaparehistro para makaboto sa palaabuton nga piniliay.

Sa karon, ang Roxas City BJMP ang may ara nga 134 ka mga priso, 128 sang mga ini ang lalaki kag anom naman ang mga babaye. (JSC/JBG-PIA6 Capiz)

Read more...

Mga ginikanan kag kabarangayan ginpanawagan para sa pagpaluntad sang kalinong kag katawhayan

SYUDAD SANG ROXAS, Capiz, Pebrero 28 (PIA6) – Ginpanawagan sang mga katapu sang Roxas City Peace and Order Council (RCPOC) sa pagpamuno ni Mayor Angel Alan Celino ang mga ginikanan kag mga kabarangayan sa pagbuliganay agud mapaluntad ang kalinong kag katawhay sa Syudad.

Ini matapos nga nagpatigayon sang isa ka emergency meeting ang amo nga konseho agud talakayon ang mga nagakadapat nga himuon angot sa sunod-sunod nga kinawatay sa Syudad snag Roxas nga nagalakip sa mga dalagko nga mga establisemento komersyal, panimalay kag mga talatapan sang gobyerno.

Ginpahayag ni City Councilor Powell del Rosario nga daku ang responsibilidad sang mga ginikanan sa pagtutok sa ila kabataan kag pagsiguro nga indi ang mga ini magamit sang mga criminal sa paghimo sang mga kriminalidad subong sang pagpangawat.
Suno man sa iya nga kasubong sang mga ginikanan, daku man ang papel kag responsibilidad sang mga opisyales sang barangay agud mapaluntad ang kalinong kag katawhay lakip na ang pagbatay sa mga layaw nga tawo sa ila tagsa ka lugar.

Suno pa kay Del Rosario nga ang pagpatuman sang Curfew ordinance nga nagadumili sa mga menor de edad nga maglagaw pa sa kalye humalin alas 10 sa gab-i tubtub alas 4 sa magaaga ang nagakadapat lakip man ang pagpatuman sang Junkshop ordinance nga nagamando sa mga nagabakal sang basura ukon mga junk nga mga bagay sa kabarangayan sa pagkuha sang identification card sa city licensing office.

Ginpahayag pa niya nga masami ang mga kabataan ang ginagamit sang mga kawatan sa pagpaniktik ukon una nga nagasulod sa mga panimalay, establisimiento ukon opisina.

Nahisugtan man sang mga katapu sang RCPOC nga labi pa nga pasangkaron sang kapulisan ang ila police visibility pinaagi sa pagpatrolya kag intelligence network agud mahibaluan kag madakop ang mga katawan.

Nagpasalig man ang mga kapitan sang kabarangayan sa pagpasangkad man sang ila pagpatrolya kag pagronda pinaagi sa ila tagsa ka mga barangay civilian volunteer organization (CVO), barangay tanod kag Barangay Peacekeeping Action Teams (BPATs). (PIA/Jemin B. Guillermo)

Read more...

CSC magahiwat sang pasinawan sa Abril 14

SYUDAD SANG ROXAS, Capiz, Pebrero 7(PIA6) --Natalana na sang Civil Service Commission ang pasinawan para sa magakuha sang professional kag sub-professional level sa sini nga tuig.

Suno kay Capiz CSC Director Maria Lina Gonzaga nga ang nauna nga pasinawan ang hiwaton sa Abril 14 kag sa Oktubre 13 naman ika-duha nga eksaminasyon.

Suno man sa iya nga ang deadline para sa Abril 14 nga pasinawan amo ang Pebrero 28.

Ginpanawagan man ni Gonzaga ang mga interesado nga magkuha sang career examination sa pagfile sa mas madali nga panahon sang ila mga application form sa pinakamalapit nga talatapan sang CSC.

Ginklaro man niya nga ang mga out-of-school kag mga undergraduate nga mga estudyante ang sarang man makakuha sang amo nga pasinawan.

Suno pa sa iya nga nagakadapat nga indi magnubo sa 80 porsyento ang makuha nga grado para makapasar sa amo nga pasinawan.

Ginpahayag man ni Gonzaga nga ang examination fee para sa professional ukon sub-professional nga level sang eksaminasyon ang P500.00.

Isa sa mga testing center para sa Abril 14 nga pasinawan ang Syudad sang Roxas. (PIA/JBGuillermo)

Read more...

Capiceños handa na sa pagdalagan para sa pagluwas sang kabuhi

SYUDAD SANG ROXAS, Capiz, Pebrero 6 (PIA6) – Handan a ang mga Capiceño para sa Million Volunteer Run sang Philippine Red Cross (PRC) nga hiwaton sa maabot nga Domingo, Pebrero 10.

Ginpahayag ni Capiz PRC Chapter Administrator Nelia Cartujano nga masobra na sa 2 mil ka mga volunteer ang nakaparehistro para sa pagpasakup sa amo nga hilikuton nga maytema nga “dalagan sa Pagluwas sang Kabuhi” ukon Run to Save Lives.

Suno man kay Cartujano nga ang tanan nga mga local nga pamunuan sa probinsya sang Capiz lakip na ang mga nasyonal nga ahensya sang gobyerno, mga pribado nga mga grupo, buluthuan kag katapu sang medya ang magapasakup sa amo nga hilikuton nga magasugod las 6 sa aga sa amo nga adlaw.

Ang million volunteer run ang magahalin sa public plaza sang Syudad padulong sa Peoples Park sa barangay Baybay.

Ginpahayag man ni Cartujano nga maluwas sa 2 mil ka mga nakaparehistro na nga magadalagan, madamo pa ang nagkompirma sa pagpasakop sa amo nga dululungan nga hilikuton sang Philippine Red Cross.

Ginpanawagan man niya ang luyag pa magpasakop sa pagparehistro sa ila talatapan kag magsuksok sang pula nga tshirt sa adlaw sang pagdalagan bilang pagpakita sang suporta sa boluntaryo nga mga hilikuton.

Suno man kay Cartujano nga kabahin sang matipon nga pundo sa amo nga fun run ang magakadto sa mga galatuhan para sa pag-organisar kag paghanas sang 143 nga volunteer group tagsa ka barangay nga mangin volunteer nga grupo para sa mga humanitarian works.(PIA/JBGuillermo)

Read more...

Pagtaas sa koleksyon sa buhis sa Capiz nagapakita sang maayo nga ekonomiya

SYUDAD SANG ROXAS, Capiz, Enero 31 (PIA6) -- Padayon nga nagapadayon ang ekonomiya sa probinsya sang Capiz, suno sa Bureau of Internal Revenue.

Ginpaathag ni Capiz Revenue District Officer Gil Tabanda nga bangud sa tayuyon nga pagtaas sang koleksyon sa buhis tagsa ka tuig, nagapakita nga maayo ang ekonomiya sang lugar.

Ginpahayag ni Tabanda nga sang nagligad nga tuig 2012, ang koleksyon sa buhis sang BIR diri sa Capiz ang naglab-ot sa masobra P701.5 milyones nga mas mataas sang masobra P109.6 milyones sa koleksyon sang tuig 2011 nga kapin lamang sa masobra P591.8 milyones.

Suno man sa iya nga ang 18.53 porsyento nga pagtaas sang koleksyon sa buhis sang nagligad nga tuig ang nagapakita sang “economic growth” ukon pag-ayo sang ekonomiya diri sa probinsya.

Suno man kay Tabanda nga ang koleksyon sa buhis sang nagligad nga tuig ang mas mataas man sang kapin P3.1 milyones ikompara sa ila target.

Maluwas sa pag-umwad sang ekonomiya, gintumod man niya ang kooperasyon kag suporta sang mga pumoluyo pinaagi sa husto nga pagbayad sang buhis lakip na ang padayon nga masangkaron nga kampanya sang BIR kaupod ang iban pa nga mga sektor sa kumonidad agud mapaathag ang importansya sang buhis sa pagdala sang mga kauswagan sa pungsod.

Para malab-ot naman nila ang ila target sa sini nga tuig, liwat nga naga-apelar si Tabanda sa mga pumoluyo sa pagbayad sang nagakaigo nga buhis sa tama nga oras. (PIA/Jemin B. Guillermo)

Read more...

PhilHealth nagpanawagan sang suporta para sa ‘Dalagan 2013’

SYUDAD SANG ROXAS, Capiz, Enero 26 (PIA6) – Nagpanawagan ang PhilHealth sa mga Capiceños para suportahan ang hilikuton sang amo nga ahensya para malab-ot sang pungsod ang handom sa paghatag sang maayo nga lawas para sa tanan ukon ang universal health care.

Ginpahayag ni Capiz PhilHealth Information Officer Mary Jane Amigo nga kinahanglanon ang suporta sang tanan lakip na sang mga Capiceños para mahatag sang gobyerno sa mga pumoluyo ang dekalidad nga serbisyo sa ikaayong-lawas.

Partikular nga ginapangayuan ni Amigo sang suporta ang palaabuton nga PhilHealth Run 2013: The Nationwide Run for Mother and Child Protection angot sa pagsaulog sang ika-18 nga anibersaryo sang amo nga ahensya sa maabot nga bulan sang Pebrero.

Ang amo nga hilikuton ang dululungan nga dalagan nga hiwaton sa 18 ka mga mayor nga syudad sa Pilipinas.

Para sa Rehiyon 6, ang dalagan ang patigayunon sa Syudad sang Iloilo sa Pebrero 17 nga magasugod 4:30 sa aga, sa diin ginapanan-aw nga nilibo ang magapasakup diri.

Tinutuyo man sang amo nga hilikuton nga makatipon sang pundo para sa programa sa paghatag sang libre nga health insurance sa mga imol lakip na ang pagbulig sa mga pasyente sa kanser sang Philippine Children Medical Center kag sang Kaibigan ng mga Kabataang may Kanser.

Sa mga interesado nga mga lokal nga pamunuan, pribado kag pampubliko nga mga talatapan, pribado nga indibidwal lakip na sang mga non-government kag civic organization nga luyag maghatag sang ila donasyon ukon pinansyal nga bulig, sarang nila mahatag ang mga ini pinaagi sa talatapan sang PhilHealth diri sa probinsya sang Capiz. (PIA/Jemin B. Guillermo)

Read more...

Suporta sang Capiceños para sa early registration ginpanawagan

SYUDAD SANG ROXAS, Capiz, Enero 25 (PIA6) -- Ginpanawagan sang mga opisyal sang Department of Education diri sa Capiz ang suporta sang mga pumoluyo kag mga opisyal sang kabarangayan para sa pagsugod sang early registration para sa mga estudyante sa masunod nga pagbukas sang klase.

Suno kay Roxas City Schools Division Superintendent Miguel Mac Aposin nga ang nasambit nga early registration ang magasugod sa Enero 26, Sabado, sa diin bukas ang tanan nga pampubliko nga mga buluthuan para sa paglista sang mga estudyante.

Angot man diri, ginapanawagan ni Aposin ang suporta sang mga ginikanan pinaagi sa pagpalista sang ila kabataan nga maga kindergarten, Grade I ukon Grade 7 sa pagbukas sang klase sa maabot nga Hunyo.

Nagapangayo man sila sang bulig para ma-enrol liwat ang mga kabataan nga nag-untat sa pag-eskwela kag makabalik kag makatapos sang ila pagtuon.

Tinutuyo sang temprano nga pagpanglista sang kabataan nga mahibaluan ang kadamuon sang mga estudyante para mahandaan sang DepEd ang mga kinahanglanon sang mga buluthuan ilabi na sa bahin sang mga classroom, libro, pulungkuan kag iban pa.

Ginpahayag naman ni Capiz DepEd Division Superintendent Eveleth Gamboa nga nakapadala na siya sang mga direktiba sa tanan nga mga district supervisors, mga prinsipal kag mga manunudlo sa elementarya kag high school sa bug-os nga probinsya sa paghanda para sa pagsugod snag early registration.

Suno man kay Gamboa nga sumugod sa Enero 26, magatayuyon na tubtub sa pagbukas sang klase sa Hunyo ang ila paglista sang mga estudyante para mapasiguro nga yara sa mga eskwelahan ang mga kabataan .

Suno pa sa iya nga kabahin sa ila kampanya ang pagpakighinun-anon sa mga opisyales sang kabarangayan kag ang pagpamalay-balay agud malab-ot ang mga kabataan. (PIA/Jemin B. Guillermo)

Read more...

5 ka mga estudyante sa Capiz nakapasar sa scholarship sang DOST

SYUDAD SANG ROXAS, Capiz, Enero 23 (PIA6) -- Lima ka mga Grade VI nga estudyante sa Capiz ang nakapasar sa pasinawan sang Department of Science of Technology para mangin iskolar sa idalum sang Philippine Science High School.

Ginpahayag ni Capiz DOST Information Officer Juafe Abariles nga kalakip sa mga nakapasar sa amo nga PSHS scholarship examination sanday Jem Patrice Alfonso kag Jean Dorothy Andrada sang Capiz Commercial School, Aldrean Paul Alogon sang Sigma Central Elementary School, Ashley Marie Bargas sang St. Mary’s Academy of Capiz kag LJ Jesse Macadangdang sang Dao Central School.

Suno kay Abariles nga pinaagi sa amo nga scholarship program sang DOST, mahatagan kahigayunan ang nasambit nga mga estudyante nga mangin iskolar sang gobyerno kag mahanas sa bahin sang science kag mathematics.

Suno pa sa iya nga ang lima ka mga Capiceno nga pasado nga mga estudyante ang kalakip sa 1,143 nga mga nakapasar sa bug-os nga pungsod kag kalakip man sa 98 ka mga pasado para sa Western Visayas.

Pila sa mga prebelihiyo nga ginahatag sang gobyerno para sa nasambit nga mga scholar ang libre nga tuition fee, libre nga loan sa text books, bulanan nga allowance, uniform, transportation kag living allowance. (PIA/Jemin B. Guillermo)

Read more...

CSC magapatigayon sang pasinawan para sa fire officer

SYUDAD SANG ROXAS, Capiz, Enero 21 (PIA6) -- Natalana nga magpatigayon sang fire officer examination ang talatapan sang Civil Service Commission sa maabot nga Marso 10 sini nga tuig.

Suno kay Capiz CSC Director Maria Lina Gonzaga nga ang nasambit nga pasinawan para sa mga luyag mangin eligible bilang fire officer ang pagahiwaton sa Syudad sang Iloilo.

Suno man sa iya nga para sa mga interesado sa amo nga pasinawan, sarang sila makasumite sang ila application form sa tanan nga mga field office sang Civil Service Commission tubtub sa Enero 24.

Ginpahayag man niya nga para ma qualify sa amo nga pasinawan, ang aplikante ang dapat Filipino nga may mayo nga pamatasan, mentally kag physically fit kag wala masentensyahan pinaagi sa pinal nga desisyon sang kaso nga nagalakip sa moral turpitude ukon imoral nga pamatasan ukon pagdinaya sa pagkuha sang eksaminasyon, pagkahubog ukon adiksyon sa droga kag madamo pa nga iban.

Suno pa kay Gonzaga nga ang iban pa nga mga kwalipikasyon lakip na ang pormas sa amo nga pasinawan ang sarang makita sa ila website sa www.csc.gov.ph.

Ginpahayag man niya nga 80 porsyento nga grado ang kinahanglan para mapasar ang nasambit nga pasinawan. (JSC/JBG-PIA6 Capiz)

Read more...

Pagpautang sang emergency loan sang GSIS ginpalawig

SYUDAD SANG ROXAS, Capiz, Enero 12 (PIA6) - - Sarang pa maka utang sang emergency loan ang nabilin nga masobra duha ka libo ka mga myembro sang Government Service Insurance System (GSIS) diri sa probinsya sang Capiz.

Suno kay Capiz GSIS Branch Manager Glorietta Dublas nga ginpalawig pa sang ila ahensya ang pagbaton sang mga application para sa emergency loan tubtub sa Enero 18 para sa mga nagagamit sang ila eCard or UMID eCard kag asta sa Enero 16 para naman sa over-the-counter nga mga aplikante.

Suno pa sa iya nga ang application sa mga GW@PS kiosks ang tubtub alas 10 sa gab-i sang Enero 18 kag tubtub naman alas 5 sa hapon sang Enero 16 para sa over-the-counter application agud mahatagan sang tion ang pag manumano nga pagproseso kag pag-aprubar sang amo nga mga emergency loan.

Ginpahayag ni Dublas nga sang Enero 5 nga amo kontani ang katapusan nga adlaw sa pagbaton sang emergency loan application, masobra sa 8,900 sa kabilugan nga 11,214 ka mga myembro sang GSIS diri sa Capiz ang naka agum sang tag P20,000 nga emergency loan.

Sa pihak nga bahin, sumugod sini nga bulan sang Enero, indi na magnubo sa P5,000 ang mabaton nga bulanan pensyon sang mga retirado sang gobyerno ukon pensyonado.

Suno kay Dublas nga makabaton sang dugang nga 1.5 porsyento nga pagtaas sa ila bulanan nga pensyon ang mga pensyonado nga nagabaton sadto sang masobra P8,000 nga bulanan nga pensyon, samtang may dugang pa nga tag P200 ka pesos maluwas pa sa 1.5 porsyento nga dugang sa ila bulanan nga pensyon sa yadtong mga nagabaton sang pension nga masobra P5 ka libo ka pesos apang indi magsobra sa P8 ka libo nga pensyon. (PIA/Jemin B. Guillermo)

Read more...

Kahalitan sang bagyo Quinta sa Capiz naglab-ot sa P200-M

SYUDAD SANG ROXAS, Capiz, Enero 11(PIA6) -- Malapit sa 200 milyones pesos nga kahalitan ang gindala sa agrikultura kag imprastraktura sang bagyo Quinta sa probinsya sang Capiz.

Sa pinal nga report sang Capiz Provincial Disaster Risk Reduction and Management Council (PDRRMC) nga ginapamunuan ni Governor Victor Tanco sining karon lang, ginpakita nga ang kahalitan sa agrikultura ilabi na sa pananum sa humay, mais kag pangisdaan ang masobra sa P60.12 milyones.

Ang halit sa masobra 17,300 ektariya nga humayan ang ginbanabana nga naglab-ot sa masobra P50.86 milyones maluwas sa masobra man P7.8 milyones nga halit sa pananum nga mais kag P885 mil pesos sa mga ulutanon.

Ang halit naman sa pangisdaan ang naglab-ot sa tunga sa milyon ka pesos samtang masobra man sa P139.7 milyones ang halit sa imprastraktura labi na sa provincial road nga nagalab-ot sa 285.1 kilometro.

Basi sa rekord man sang PDRRMC, kapin man sa apat ang napatay diri sa Capiz bangud sa pagkalumos maluwas sa isa pa nga wala pa makita tubtub sa karon.

Suno pa sa amo nga report nga kapin sa 152 ka mga barangay sa Capiz nga nagalakip sa 15,106 ka mga pamilya ukon 56,812 ka mga persona ang apektado sang bagyo Quinta nga naglaslas sa probinsya sang Capiz sang Disyembre 25.

Sa amo man nga report ginpakita nga walo ka mga balay ang lubos nga nawasak kag 52 naman ang parsyal nga nahalitan.

Nauna na nga ginpaidalum sang Sangguniang Panlalawigan sang probinsya sa state of calamity ang mga lugar diri sa Capiz nga nahalitan sang nasambit nga bagyo bangud sang daku nga kahalitan sa agrikultura, propedad, imprastraktura kag kabuhi sang mga pumoluyo. (PIA/Jemin B. Guillermo)

Read more...

LTO magapatuman sang laye sa paggamit sang helmet

SYUDAD SANG ROXAS, Capiz, Enero 3 (PIA6) -- Hugot nga igapatuman sang mga katapu sang Land Transportation Office and laye nga nagamando angot sa paggamit sang helmet.

Suno kay Roxas City LTO Information Officer Isidro Alex de Vicente nga nakahanda na sila sa pagpatuman sang Republic Act 10054 ukon ang Motorcycle Helmet Act of 2009 sumugod sining bulan sang Enero sini nga tuig.

Suno sa iya nga mangin full-blast na ang ila operasyon sa Syudad sang Roxas kag sa mga kabanwahanan sa probinsya sang Capiz sa pagpatuman sang nasambit nga laye nga nagamando sa tanan nga motorista subong man sang naga angkas sa mga single nga motorsiklo sa pagsuksok sang helmet.

Ginpahayag man niya nga magapakig-angot man sila sa mga katapo sang kapulisan agud mangin katuwang nila sa pagpatuman sang nasambit nga laye.
Nagpanawgan man si De Vicente nga sundon ang laye angot diri agud mapaiway ang penalidad kag multa sa paglapas sang amo nga laye.

Samtang, ginpabutyag man ni Capiz Trade and Industry Provincial Director Ermelinda Pollentes nga natapos na sang Disyembre 28 ang ila pag-verify kag pag isyu sang sticker para sa mga helmet.

Suno sa iya nga kapin sa 8,233 ka mga helmet ang ila na verify kag nabutangan sang sticker diri sa probinsya nga naga representar sang kapin 95 porsyento sang mga rehistrado nga may nga motorsiklo.

Suno pa kay Pollentes nga nakatuon naman sa karon ang ila pag-inspeksyon sa mga balaligyaan sang helmet kag motorsiklo agud mapasiguro nga standard kag may Philippine Standard (PS) ukon Import Commodity Clearance (ICC) sticker ang ila sini ginabaligya nga mga helmet sa ila bumalakal. (PIA/Jemin B. Guillermo)

Read more...

283 ka mga Capiceño nga estudyante nagkuha pasinawan sa DOST

SYUDAD SANG ROXAS, Capiz, Disyembre 13 (PIA6) --Kapin sa 283 ka mga magatapos sa high school sini nga tuig gikan sa probinsya sang Capiz ang nagkuha sang pasinawan para malakip sa iskolar sang Department of Science and Technology sa masunod nga tuig.

Ginpahayag ni Capiz DOST Information Officer Juafe Abariles nga ang mga aspirante para sa DOST Science Education Institute (DOST-SEI) Undergraduate Scholarship Program ang nagkuha sining karon lang sang pasinawan diri sa Syudad sang Roxas.

Tinutuyo sang amo nga esksaminasyon nga mapili ang may mga talento kag nagakaangay nga mga estudyante para sa pag enroll sa apat tubtub lima ka tuig nga kurso ilabi na sa science kag technology nga field.

Ang nasambit nga scholarship program sang DOST, suno kay Abariles, ang santo sa Republic Act 7687.

Pila sa igahatag nga mga prebelihiyo para sa malakip nga mga iskolar sang DOST ang bayad sa tuition kag iban pa mga mga balayaran sa eskwelahan, book allowance, bulanan nga balon para sa 10 tubtub 11 ka bulan tagsa ka tuig.

Samtang, kapin man sa 32 ka mga kabataan sang mga Capiceño nga Overseas Filipino Workers ang nagkuha man sang pasinawan para sa scholarship nga igahatag sang Overseas Workers Welfare Administration para sa mga bata sang mga OFW. (PIA/JBGuillermo)

Read more...

Mga myembro sang GSIS sa Capiz mahimo maka emergency loan

SYUDAD SANG ROXAS, Capiz, Disyembre 12 (PIA6) -- Mahimo na nga makautang sang emergency loan ang mga myembro sang Government Service Insurance System (GSIS) matapos nga maapektuhan ang pila ka mga lugar sa Pilipinas sang halit dala ni bagyo Pablo.

Suno kay Capiz GSIS Manager Glorietta Dublas nga ang masobra 11 mil ka mga myembro sang GSIS diri sa Capiz ang mahimo maka utang sang emergency loan nga P20,000.

Suno man sa iya nga ang probinsya sang Capiz ang nalakip sa 34 tanan ka mga probinsya sa Visayas kag Mindanao nga sarang maka emergency loan sa GSIS.

Luwas sa Capiz, nalakip man sa mga probinsya, sa diin ang mga myembro sang GSIS ang maka emergency loan, amo ang mga probinsya sang Aklan, Antique, Iloilo, Negros Occidental, Agusan del Norte, Agusan del Sur, Basilan, Biliran Sub-Province, Bohol, Bukidnon, Camiguin, Cebu, Compostela Valley, North Cotabato, South Cotabato, Lanao Del Norte, Lanao Del Sur, Leyte, Maguindanao, Misamis Occidental, Misamis Oriental, Negros Oriental, Saranggani, Siquijor, Southern Leyte, Sultan Kudarat, Surigao del Norte, Davao del Norte, Davao del Sur, Davao Oriental, Zamboanga Del Sur, Surigao del Sur kag Zamboanga Del Norte.

Ginpahayag man ni Dublas nga ang paghatag nila sang emergency loan ang nagsugod sang Disyembre 7 kag magatapos sa Enero 5, 2013.

Para naman sa mga myembro nila nga nagahawid sang temporaryo nga eCard ukon indi mabasahan ang ila finger print sang GWAPS machine, sarang man sila gihapon maka utang pinaagi sa over-the-counter nga transaksyon pinaagi sa pag fill-up sang Emergency Loan application kag pagpa photo copy sang ila temporaryo nga eCard kag isumite sa talatapan sang GSIS.(PIA/JBGuillermo)

Read more...

CSC liwat nagpang-agda sa mga Capiceño sa pagpasakup sa paindis-indis

SYUDAD SANG ROXAS, Capiz, Disyembre 5 (PIA6) -- Gin-agda sang Civil Service Commission ang mga Capiceño nga mga empleyado kag opisyal sang gobyerno sa pagpasakup sa pagpili sang pinaka outstanding nga alagad sang mga pumoluyo.

Suno kay Capiz Civil Service Commission Director Maria Lina Gonzaga nga ang pagpili sang Outstanding Public Officials and Employees sa masunod nga tuig ang kabahin sa ila kampanya sa pagpakita sang pinasahi nga kinaadman kag indi matupungan nga abilidad sa paghatag sang serbisyo sang mga empleyado kag opisyal sang gobyerno para sa publiko.

Pinaagi sa sini nga search, suno kay Gonzaga, makilala ang mga kababaehan kag kalalakihan nga nangin maayo ang performance sa ila trabaho kag ang ila kontribusyon kag maayo nga mga accomplishment kag ang tayuyon nga pagpakita sang maayo nga pag ginawi kag pamatasan sa pagdala sang serbisyo sa mga pumoluyo.

Ginpahayag man niya nga ang amo nga paindis-indis ang nagasakup sa tatlo ka kategoriya nga nagalakip sa Presidential Lingkod Bayan Award, Outstanding Public Official and Employee ukon Dangal ng Bayan Award kag ang CSC Pagasa Award.

Maluwas sa indibidwal nga nominasyon para sa Presidential Lingkod Bayan kag Pagasa awards, mahimo man mag nominar para sa grupo nga kategoriya.
Ang nominasyon para sa amo nga paindis-indis ang pagabatunon tubtub Marso 29 sa masunod nga tuig.

Sining karon lang si Capiz State University President Editha L. Magallanes ang nagdaug para sa Outstanding Public Officials and Employees ukon Dangal ng Bayan Award, samtang ang Provincial Health Office sang Capiz ang nagdaug para sa Pagasa Award-group category kag si PHO Pharmacist Claire Caberoy ang nagdaug para sa Pag-asa Award – individual category.

Sang tuig 2011, ang Rural Health Unit of Dumalag, Capiz ang nagdaog man sa Pagasa award group category sang Civil Service Commission. (PIA/Jemin B. Guillermo)

Read more...

DOE magapaathag sa mga Capiceño tuhoy sa Philippine Energy Plan

SYUDAD SANG ROXAS, Capiz, Nobyembre 22 (PIA6) -- Magahiwat sang isa ka pulong-pulong ang mga matag-as nga opisyal sang Department of Energy agud mapresentar kag mapakita sa mga Capiceڞo ang plano sang pungsod tuhoy sa enerhiya.

Ang amo nga pagtililipon nga pasakupan sang mga tiglawas gikan sa nagkalin-lain nga sektor subong sang mga electric cooperative, negosyante, lokal kag nasyonal nga mga pamunuan sang gobyerno, mga katapu sang medya kag madamo pa nga iban ang pagahiwaton sa Nobyembre 27.

Suno kay DOE Undersecretary Josefina Patricia Asirit nga ang amo nga hilikuton ang kabahin sang ila pagpresntar sa mga pumoluyo sang mga mga target, estratihiya, plano kag mga programa ilabi na sang Philippine Energy Plan para sa 2012 tubtob 2030 nga ginapangunahan sang amo nga ahensya.

Pinaagi sa amo nga kampanya, suno pa kay Asirit, ila masabat ang mga isyu, problema kag iban pa nga mga palamangkutanon nga nagasakop sa pagpasanyog sang enerhiya sa pungsod.

Pila sa pagahatagan pagtamod sa amo nga hilikuton diri sa Capiz ang tuhoy sa power kag elektripikasyon, resource development, renewable energy, downstream oil, alternative fuels kag energy efficiency and conservation.

Si DOE Director Jesus Tamang sang Energy Policy and Planning Bureau ang magapamuno sang grupo gikan sa DOE Central Office nga magapadulong diri sa probinsya sang Capiz. (PIA/JBGuillermo)

Read more...

Mga ‘hot spots’ hatagan pagtamod sang Capiz PNP

SYUDAD SANG ROXAS, Capiz, Nobyembre 22 (PIA6) - Pagahatagan sang prayoridad sang mga katapu sang Philippine National Police ang mga lugar nga nalakip sa election hot spots sa probinsya sang Capiz.

Ginpahayag ni Capiz police Provincial Director Domingo Cabillan nga mas hatagan atensyon sang ila talatapan ang mga nalakip nga mga barangay sa hot spots para sa palaabuton nga piniliay sa masunod nga tuig.

Suno kay Cabillan, kapin sa 66 ka mga barangay sa probinsya sang Capiz ang may posibilidad nga kalakip sa hot spot nga mga lugar bangud sa mainit nga away sa pulitika kag subong man insurhensya.

Sa 17 tanan ka mga banwa lakip na sa Syudad, lima diri ang wala masulod sa mga hot spot area nga nagalakip sa banwa sang Panay, Pontevedra, Ivisan, Dao kag Syudad sang Roxas.

Samtang sa 60 ka mga election hot spots, 10 ka mga barangay ang sa banwa sang Maayon, 9 sa Cuartero, 8 sa Pilar, tag-6 sa Dumarao kag President Roxas, tag-5 sa Sigma kag Mambusao, 3 sa Dumalag kag tag-2 sa Panitan, Sapian, Jamindan kag Tapaz.

Suno man kay Cabillan nga mangin katuwang nila sa pagpaluntad sang kalinong kag katawhay para sa palaabuton nga piniliay ang mga kapulisan gikan sa Public Safety Company, PNP Special Action Force, mga katapu sang Barangay Peacekeeping Action Team kag iban pa nga mga volunteer nga grupo.(PIA/JBGuillermo)

Read more...

Mga Capiceño ginpanawagan sang BSP sa pagpasakup sa Tanaw Art nga paindis-indis

SYUDAD SANG ROXAS, Capiz, Nobyembre 20 (PIA6) -- Ginpanawagan sang Bangko Sentral ng Pilipinas ang mga Capiceño sa pagpasakup sa ila Tanaw Art nga paindis-indis.

Ginpanawagan ni BSP Roxas City Branch Deputy Director Leonora Siñel-Templonuevo ang mga professional ukon non-professional nga mga artist sa pagpasakup sa amo nga kompetisyon sini nga tuig indi lamang agud makilala sa bug-os nga Pilipinas kondi lakip na nga mapakita ang pagsuporta sa contemporary art.

Suno kay Templonuevo nga ang ini nga paindis-indis ang isa man ka pamaagi sang Bangko Sentral sa pagsuporta sa mga kinaadman sang mga may talento sa art.

Suno naman kay Capiz BSP Information Officer Lowen Andrew June Ligad nga ang Tanaw Art nga paindis-indis ang bukas sa mga Filipino nga naga edad 18 pataas kag tagdaug sa pila ka mga Philippine Art competition ukon nangin dinapit man sa amo nga paindis-indis sa iban nga pungsod.

Mangin balasihan sa pagpili sang mga magadaug sa amo nga paindis-indis ang creativity, technique, design, originality kag impact.

Suno pa kay Ligad nga sarang mapadala ang mga igapasakup sa Tanaw art kompetisyon tubtub sa Nobyembre 29, 2012 kag mahibaluan naman ang mga tagdaug sa bulan sang Mayo sa masunod nga tuig. (JSC/JBG-PIA6 Capiz)

Read more...

DOTC magatukod pasilidad nga makabulig sa ekonomiya sa Capiz

SYUDAD SANG ROXAS, Capiz, Nobyembre 15 (PIA6) -- apin sa 15 ka mga river landing ang igatukod sa tatlo ka mga banwa sa probinsya sang Capiz.

Ang nasambit nga proyekto ang gikan sa Department of Transportation and Communications nga ginpunduhan pa sang nagligad nga tuig sa tion sang pagpangalagad ni anay DOTC kag karon Department of the Interior and Local Government Secretary Mar Roxas.

Ginpahayag ni Capiz Sangguniang Panlalawigan Secretary Zoe Herrera nga naglab-ot sa masobra P34.92 milyones ang ginpain nga pundo para sa amo nga proyekto nga igapahamtang sa mga banwa sang Panay, Pontevedra kag Pilar.

Sa pangkabilugan nga pundo, suno kay Herrera, kapin sa P17.65 milyones ang para sa river landing sa 8 ka mga barangay sa Panay nga nagalakip sa Pawa, Lat-asan, Navitas, Jamul-awon, Agojo, Bantigue, Lomboy kag Buntod.

Sa barangay Tabuc, Hipona, Ameligan, Agbanog kag Gabuc sa banwa sang Pontevedra naman igatukod ang river landing nga may kabiligan nga pundo nga masobra P12.52 milyones, samtang ang amo man nga proyekto ang igatukod sa barangay Casanayan kag Dayhagan sa banwa sang Pilar nga may napain nga pundo nga masobra P4.75 milyones.

Suno man kay Herrera nga pinaagi sa amo nga inprastraktura, mas mangin mahapos ang pagdala sang produkto sang mga mangingisda gikan sa kadagatan padulong sa merkado lakip na nga mabuligan man ang pagpasanyog sang turismo kag ekonomiya sa probinsya sang Capiz.

Maluwas sa river landing nga proyekto, igapaidalum man sa bidding ang masobra P48 milyones nga proyekto para sa pag construct sang dugang nga runway , perimeter fence kag rehabilitasyon kag pagpalapad sang terminal passenger building sang Roxas City Airport.

Suno man kay Herrera nga aprubado man ang pundo nga masobra P11.47 milyones para sa konstruksyon sang talatapan sang Philippine Coast Guard sa Syudad sang Roxas. (PIA/JBGuillermo)

Read more...