Pagpautang sang emergency loan sang GSIS ginpalawig

SYUDAD SANG ROXAS, Capiz, Enero 12 (PIA6) - - Sarang pa maka utang sang emergency loan ang nabilin nga masobra duha ka libo ka mga myembro sang Government Service Insurance System (GSIS) diri sa probinsya sang Capiz.

Suno kay Capiz GSIS Branch Manager Glorietta Dublas nga ginpalawig pa sang ila ahensya ang pagbaton sang mga application para sa emergency loan tubtub sa Enero 18 para sa mga nagagamit sang ila eCard or UMID eCard kag asta sa Enero 16 para naman sa over-the-counter nga mga aplikante.

Suno pa sa iya nga ang application sa mga GW@PS kiosks ang tubtub alas 10 sa gab-i sang Enero 18 kag tubtub naman alas 5 sa hapon sang Enero 16 para sa over-the-counter application agud mahatagan sang tion ang pag manumano nga pagproseso kag pag-aprubar sang amo nga mga emergency loan.

Ginpahayag ni Dublas nga sang Enero 5 nga amo kontani ang katapusan nga adlaw sa pagbaton sang emergency loan application, masobra sa 8,900 sa kabilugan nga 11,214 ka mga myembro sang GSIS diri sa Capiz ang naka agum sang tag P20,000 nga emergency loan.

Sa pihak nga bahin, sumugod sini nga bulan sang Enero, indi na magnubo sa P5,000 ang mabaton nga bulanan pensyon sang mga retirado sang gobyerno ukon pensyonado.

Suno kay Dublas nga makabaton sang dugang nga 1.5 porsyento nga pagtaas sa ila bulanan nga pensyon ang mga pensyonado nga nagabaton sadto sang masobra P8,000 nga bulanan nga pensyon, samtang may dugang pa nga tag P200 ka pesos maluwas pa sa 1.5 porsyento nga dugang sa ila bulanan nga pensyon sa yadtong mga nagabaton sang pension nga masobra P5 ka libo ka pesos apang indi magsobra sa P8 ka libo nga pensyon. (PIA/Jemin B. Guillermo)