Kahalitan sang bagyo Quinta sa Capiz naglab-ot sa P200-M

SYUDAD SANG ROXAS, Capiz, Enero 11(PIA6) -- Malapit sa 200 milyones pesos nga kahalitan ang gindala sa agrikultura kag imprastraktura sang bagyo Quinta sa probinsya sang Capiz.

Sa pinal nga report sang Capiz Provincial Disaster Risk Reduction and Management Council (PDRRMC) nga ginapamunuan ni Governor Victor Tanco sining karon lang, ginpakita nga ang kahalitan sa agrikultura ilabi na sa pananum sa humay, mais kag pangisdaan ang masobra sa P60.12 milyones.

Ang halit sa masobra 17,300 ektariya nga humayan ang ginbanabana nga naglab-ot sa masobra P50.86 milyones maluwas sa masobra man P7.8 milyones nga halit sa pananum nga mais kag P885 mil pesos sa mga ulutanon.

Ang halit naman sa pangisdaan ang naglab-ot sa tunga sa milyon ka pesos samtang masobra man sa P139.7 milyones ang halit sa imprastraktura labi na sa provincial road nga nagalab-ot sa 285.1 kilometro.

Basi sa rekord man sang PDRRMC, kapin man sa apat ang napatay diri sa Capiz bangud sa pagkalumos maluwas sa isa pa nga wala pa makita tubtub sa karon.

Suno pa sa amo nga report nga kapin sa 152 ka mga barangay sa Capiz nga nagalakip sa 15,106 ka mga pamilya ukon 56,812 ka mga persona ang apektado sang bagyo Quinta nga naglaslas sa probinsya sang Capiz sang Disyembre 25.

Sa amo man nga report ginpakita nga walo ka mga balay ang lubos nga nawasak kag 52 naman ang parsyal nga nahalitan.

Nauna na nga ginpaidalum sang Sangguniang Panlalawigan sang probinsya sa state of calamity ang mga lugar diri sa Capiz nga nahalitan sang nasambit nga bagyo bangud sang daku nga kahalitan sa agrikultura, propedad, imprastraktura kag kabuhi sang mga pumoluyo. (PIA/Jemin B. Guillermo)