Capiceños nga apektado sang kalamidad may temporaryo nga trabaho

SYUDAD SANG ROXAS, Capiz, Nobyembre 13 (PIA6) -- Kapin sa 1,596 ka mga internally displaced person ukon mga persona nga naapektuhan sang kalamidad sa Capiz ang karon nagsugod na sa ila 10 ka adlaw nga trabaho nga pagabayaran sang Department of Social Welfare and Development.

Ang amo nga mga persona nga nahalitan sang kalamidad subong sang baha ang gikan sa mga banwa sang Maayon, Panay, Pilar, Mambusao, Panitan kag Dumarao.

Ginpahayag ni Capiz DSWD Field Office head Josephine Degala nga 11 tanan ka mga banwa ang nalakip sa amo nga programa, sa diin nagalab-ot sa 2,715 tanan ang mga benepisyaryo sang amo nga programa sang nasyonal nga pamunuan apang ang anum pa lamang ka mga banwa ang nakasumite sang ila tagsa ka proposal.

Suno man sa iya nga gilayon man nga iga-implementar ang nasambit nga programa sa nabilin nga apat ka banwa kag Syudad sang Roxas sa tion nga masumite na nila ang ginakinahanglan nga proposal.

Ini nga mga banwa ang nagalakip sa Jamindan, Dao, Pontevedra, kag Sigma kag Syudad sang Roxas.

Ginpahayag man ni Degala nga prayoridad nga hatagan sang temporary nga trabaho ang mga benepisyaryo sang 4Ps nga nahalitan sang kalamidad diri sa probinsya.

Suno pa sa iya nga ang tagsa ka benepisyaryo sang cash for work nga programa ang magabaton sang tag P208 tagsa ka adlaw kabaylo sa ila trabaho ukon P2,080.00 para sa sulod sang 10 ka adlaw.(PIA/JBGuillermo)