NSO hibaluon ang masami ginabisitahan nga lugar sa Pilipinas

SYUIDAD SANG ROXAS, Capiz, Nobyembre 13 (PIA6) -- Ginapatigayon sang National Statistics Office sini nga bulan sang Nobyembre ang pag Household Survey on Domestic Visitors (HSDV) agud mahibaluan kon pila ang mga nagakadto sa probinsya sang Capiz.

Ini ang ika-duha nga paghiwat sang amo nga survey katuwang ang Department of Tourism agud mahibaluan ang kadamuon sang mga lokal kag internasyonal nga mga turista nga nagapadulong diri kag ang mga tinutuyo nila sa pagbisita sa probinsya.

Ginpahayag ni NSO Provincial head Frankie Dordas nga bangud sang amo man nga survey sang 2010, nahibaluan nga ang probinsya sang Capiz ang naka rekord sang 566 mil ka mga bisita sa probinsya kag 236 mil sa mga ini ang nagkari para sa pagbakasyon.

Bangud sini, ang probinsya sang Capiz ang ika-20 ka mga lugar sa Pilipinas nga may pinakamadamo nga bisita sang amo nga tuig.

Sa pangkabilugan nga resulta sang 2010 nga survey ginapakita nga ang National Capital Region amo ang masami nga ginabisitahan sang mga turista sang Abril tubtub Septyembre sa amo nga tuig nga naglab-ot sa 7.1 milyones ang mga domestic nga mga bisita kag 3.4 milyones sang mga ini ang para sa paglingaw-lingaw ukon bakasyon lamang.

Kalakip man sa masami ginabisitahan, suno kay Dordas, ang Cavite, Laguna, Pangasinan, Batangas, Nueva Ecija kag Bulacan nga may 1.3 milyones ka mga bisita, kag ginasundan man ini sang Pampanga, Quezon, Benguet kag Rizal.

Sa Visayas naman, ang Negros Occidental ang nagpanguna sa listahan sang masami ginabisitahan kag ginasundan sang Iloilo, Leyte, Capiz kag Negros Oriental.
Ang masami ginabisitahan sa Mindanao amo ang mga lugar sang Lanao del Norte, Misamis Oriental kag Zamboanga del Norte.

Suno man kay Dordas nga ang amo nga datus ang pagagamiton sang gobyerno nasyonal kag mga lokal man nga pamunuan sa pagdugang pasanyog sang ila mga programa sa turismo nga nagabulig sa ekonomiya sang isa ka lugar.

Ginpanawagan naman niya ang napilian nga mga tagsabat gikan sa mga sample nga mga kabarangayan sa probinsya sang Capiz sa paghatag sang tama nga impormasyon agud mangin maayo kag husto ang resulta sang nasambit nga survey.(PIA/JBGuillermo)