SYUDAD SANG ROXAS, Capiz, Oktubre 17 (PIA6) -- Mangin katuwang sang mga katapu sang kapulisan sang Capiz kag mga myembro sang Philippine Army ang bag-o lang ginpadala nga tropa sang Special Action Force diri sa probinsya.
Ginpahayag ni Police Regional Director Agrimero Cruz Jr. nga ang isa ka kompaniya sang SAF nga ginabug-usan sang 72 ka mga non-commissioned police officers kag mga opisyales ang magabulig sa tropa sang gobyerno agud mapasiguro ang kalinong, katawhay kag siguradad sang mga pumoluyo kontra sa insurhensya.
Suno kay Cruz nga ang pagpadala sang SAF ang bangud man sa pinakaulihi nga report sa paghulag liwat sang komunista nga grupo lakip na ang pagpang harass a pumoluyo sa pila ka bahin sang probinsya.
Gin-athag man niya nga ang mga katapu sang SAF nga napahamtang sa barangay Manhoy, Dao, Capiz ang maga-operate indi lamang sa probinsya sang Capiz kondi lakip man sa mga boundary sang kalapit nga probinsya subong sang Iloilo, Aklan kag Antique
Suno pa kay Cruz nga ang pagpabilin sang SAF sa Capiz ang igabase man sa sitwasyon sa kalinong kag katawhay diri kag sarang naman igapadala ang amo nga grupo sa iban nga mas nagakinahanglan nga lugar kon makita nga masarangan na sang lokal nga mga pulis ang pagsabat sa kalinong kag katawhay sa probinsya.
Ginpasalig naman ni Governor Victor Tanco ang lubos nga suporta sang probinsya kag lokal nga pamunuan sang kabanwahanan kag kabarangayan para sa mga katapu sang SAF para sa kalinong kag katawhayan sa kumonidad.
Suno kay Tanco nga pinaagi sa presensya kag bulig sang SAF, labi nga mapreserba kag mapaayo ang sitwasyon sang kalinong kag katawhay diri.
Ginpahayag man niya ang pagkamalahalon sang kalinong kag katawhay para sa madasig nga pagdala sang serbisyo sa kabarangayan para sa progreso kag pag-umwad sang mga kumonidad. (JSC/JBG-PIA6 Capiz)
Miyerkules, Oktubre 17, 2012
Mag-subscribe sa:
I-post ang Mga Komento (Atom)
