SYUDAD SANG ROXAS, Capiz, Oktubre 17 (PIA6) -- Labi nga ginpasangkad ang abilidad sang mga tagpamaba sang mga soldado agud mapalab-ot sa mga pumoluyo ang tama nga impormasyon para malab-ot ang katawhayan sa pungsod.
Ginpahayag ni Public Affairs Office head Enrico Gil Ileto sang 3rd Infantry Division sang Philippine Army nga kapin sa 36 tanan ka mga Public Information Officers kag Non-Commissioned Officers gikan sa Rehiyon 6, 7 kag sa Mindanao ang nagpasakup sa duha ka adlaw nga paghanas sa kampo sa Jamindan, Capiz sining karon lang.
Sa kabilugan nga nagpasakup diri, 34 ang gikan sa Western Visayas kag sa Negros Oriental kag duha naman ang nagikan sa 15th Infantry Battalion sa Lanao del Norte.
Ginpahayag man ni Ileto nga pinaagi sa paghanas sa amo nga mga katapu sang Civil Military Operations Office sa bulig sang mga katapu sang medya, mas mangin epektibo kag maayo ang ila pagdala sang tama nga impormasyon sa kumonidad nga mangin tulay agud malab-ot ang kalinong kag katawhay.
Kalakip man sa nagpasakup sa amo nga pagtililipon kag paghanas sang mga tagpamaba sang mga soldado ang mga katapu sang medya gikan sa Capiz, Iloilo kag Syudad sang Bacolod.
Samtang, nagpasalamat naman si 3ID Commanding General Jose Mabanta sa pagbulig sang medya agud mapalab-ot sa mga pumoluyo ang tama nga impormasyon.
Suno man kay Mabanta nga pinaagi sa nasambit nga paghanas, labi nila nga mapasangkad ang ila pagpakita sang maayo nga katuyuan sang gobyerno sa pagdala sang katawhayan kag progreso sa kumonidad. (JSC/JBG-PIA6 Capiz)
Miyerkules, Oktubre 17, 2012
Mag-subscribe sa:
I-post ang Mga Komento (Atom)
