17,654 ka mga imol nga pamilya sa Syudad sang Roxas nasakup na sa PhilHealth

SYUDAD SANG ROXAS, Capiz, Oktubre 18 (PIA6) -- Kapin sa 17,654 ka mga imol nga pamilya ukon 62 mil ka mga indibidwal sa Syudad sang Roxas ang nasakup na sang PhilHealth.

Ginpahayag ni Capiz PhilHealth Information Officer Mary Jane Amigo nga ang nasambit nga mga pamilya ang nalakip sa mga programa sang nasyonal kag lokal nga panguluhan nga nagahatag sang libre nga PhilHealth insurance para sa mga imol.

Suno kay Amigo nga sa pangkabilugan nga na enroll sa libre nga PhilHealth sa Syudad, kapin sa 4,839 ang gin isponsoran sang nasyonal nga panguluhan pinaagi sa National Household Targeting System for Poverty Reduction ukon NHTS-PR.

Kapin naman sa 7,383 ka mga panimalay ang gin isponsoran sang lokal nga pamunuan sang Syudad sang Roxas kag 5,432 ang natigayon nga ma enroll sa PhilHealth sa pag-ako sang balayaran sang lokal nga pamunuan sang probinsya.

Daku naman ang pagpasalamat ni Roxas City Mayor Angel Alan Celino kay Pangulong Benigno S. Aquino sa paglakip sa PhilHealth insurance sang malapit 5 ka libo ka pigado nga mga residente sa Syudad

Suno sa iya nga daku ang mabulig sang PhilHealth sa iya mga pumoluyo ilabi na sa tion sang pagmasakit ukon pagsulod sa ospital.

Suno pa kay Celino nga ila ginaplano nga dugangan pa ang numero sang mga pamilya nga igalakip sa pagabayaran nga insurance sang Syudad sa masunod nga tuig bangod sang daku nga benepisyo para sa mga imol nga pumoluyo nila. (JSC/Jemin B. Guillermo-PIA6 Capiz)