SYUDAD SANG ROXAS, Capiz, Oktubre 30 (PIA6) -- Naka alerto na ang mga kapulisan diri sa probinsya sang Capiz para sa pagsaulog sang Todos Los Santos kag Pangalagkalag sa Nobyembre 1 kag 2.
Ginpahayag ni Capiz Police Provincial Director Domingo Cabillan nga naka red alert sila para mapasiguro ang kalinong kag katawhay sa bug-os nga probinsya
Suno sa iya nga nakapatigayon na sila sang isa ka command conference agud maplastar ang mga plano sang tagsa ka police station sa bug-os nga probinsya angot sa amo nga selebrasyon.
Suno man kay Cabillan nga pila sa mga hilikuton sang kapulisan ang pagpatigayon sang mobile kag foot patrol agud mapasangkad ang police visibility sa mga sementeryo kag mga matawo nga lugar.
Suno pa sa iya nga ang tagsa man ka mga police station ang magapahamtang sang PNP assistance desk sa gwa sang mga sementeryo kag sa mga terminal sang salakyan.
Ginpahayag pa ni Cabillan nga ang tanan nga mga kapulisan ang dapat ara sa ila tagsa ka estasyon agud sa gilayon nga pagresponde sa tion sang ano man nga hitabo.
Maluwas sa kapulisan, naka alerto man ang mga katapu sang Philippine Coast Guard diri sa probinsya angot sa pagsaulog sang Todos Los Santos.
Suno kay Roxas City Coast Guard Station Commander Jimmy Oliver Vingno nga nagpahamtang man sila sang ila passenger assistance desk sa Culasi Port agud sa pagbulig sa mga pasahero sang barko.
Maluwas sini, dugang pa nila nga ginpasangkad ang ila pagsekyar sang mga pasahero kag bagahe agud mangin matalunsay ang ila pagbyahe. (JSC/Jemin B. Guillermo-PIA6 Capiz)
Miyerkules, Oktubre 31, 2012
Mag-subscribe sa:
I-post ang Mga Komento (Atom)
