SYUDAD SANG ROXAS, Capiz, Nobyembre 14 (PIA6) -- Ginpanawagan sang Department of Trade and Industry ang mga Capiceño sa paghingalit sang oportunidad para makabakal sang mas baratao nga presyo nga mga nagapanguna kag kinahanglanon nga mga balaklon pinaagi sa Diskwento Caravan sang amo nga ahensya.
Ginpahayag ni Capiz DTI Provincial Director Ermelinda Pollentes nga pinaagi sa Diskwento caravan nga hiwaton sumugod Nobyembre 15 tubtub 16 sa Roxas city Public Plaza, mas makabintaha ang publiko bangod sa mas manubo nga presyo sang mga balaklon.
Suno sa iya nga 18 na ka mga manufacturer, dealer kag mga micro,small kag medium enterprise ang nagkompirma nga magapasakop sa amo nga caravan para sa pagbaligya sang ila mga produkto sa mas manubo nga presyo.
Kalakip sa mga igabaligya ang itlog, manok kag iban pa nga mga produkto, pasta, sabon pampaligo kag panlabada, noodles, sausage, homecare products, school supplies kag madamo pa nga iban subong sang mga kinahanglanon sa noche buena.
Suno pa kay Pollentes nga pinaagi sa amo nga diskwento caravan, mapakita man sang mga negosyante ang ila sosyal nga responsibilidad sa mga pumoluyo sa pinaagi sa pagtan-ay sang diskwento sa presyo sang ila mga produkto. (PIA/Jemin B. Guillermo)
Miyerkules, Nobyembre 14, 2012
Mag-subscribe sa:
I-post ang Mga Komento (Atom)
