DOTC magatukod pasilidad nga makabulig sa ekonomiya sa Capiz

SYUDAD SANG ROXAS, Capiz, Nobyembre 15 (PIA6) -- apin sa 15 ka mga river landing ang igatukod sa tatlo ka mga banwa sa probinsya sang Capiz.

Ang nasambit nga proyekto ang gikan sa Department of Transportation and Communications nga ginpunduhan pa sang nagligad nga tuig sa tion sang pagpangalagad ni anay DOTC kag karon Department of the Interior and Local Government Secretary Mar Roxas.

Ginpahayag ni Capiz Sangguniang Panlalawigan Secretary Zoe Herrera nga naglab-ot sa masobra P34.92 milyones ang ginpain nga pundo para sa amo nga proyekto nga igapahamtang sa mga banwa sang Panay, Pontevedra kag Pilar.

Sa pangkabilugan nga pundo, suno kay Herrera, kapin sa P17.65 milyones ang para sa river landing sa 8 ka mga barangay sa Panay nga nagalakip sa Pawa, Lat-asan, Navitas, Jamul-awon, Agojo, Bantigue, Lomboy kag Buntod.

Sa barangay Tabuc, Hipona, Ameligan, Agbanog kag Gabuc sa banwa sang Pontevedra naman igatukod ang river landing nga may kabiligan nga pundo nga masobra P12.52 milyones, samtang ang amo man nga proyekto ang igatukod sa barangay Casanayan kag Dayhagan sa banwa sang Pilar nga may napain nga pundo nga masobra P4.75 milyones.

Suno man kay Herrera nga pinaagi sa amo nga inprastraktura, mas mangin mahapos ang pagdala sang produkto sang mga mangingisda gikan sa kadagatan padulong sa merkado lakip na nga mabuligan man ang pagpasanyog sang turismo kag ekonomiya sa probinsya sang Capiz.

Maluwas sa river landing nga proyekto, igapaidalum man sa bidding ang masobra P48 milyones nga proyekto para sa pag construct sang dugang nga runway , perimeter fence kag rehabilitasyon kag pagpalapad sang terminal passenger building sang Roxas City Airport.

Suno man kay Herrera nga aprubado man ang pundo nga masobra P11.47 milyones para sa konstruksyon sang talatapan sang Philippine Coast Guard sa Syudad sang Roxas. (PIA/JBGuillermo)