SYUDAD SANG ROXAS, Capiz, Oktubre 9 (PIA6) -- Kapin sa 2,500 ka mga puno sang bakhaw ang igapananum sang mga katapu sang Kapisanan ng mga Brodkaster sa Pilipinas kaupod ang iban pa nga mga ahensya sang gobyerno nasyonal kag lokal kag iban pa nga mga volunteer nga organisasyon.
Ginpahayag ni KBP Capiz Chapter President Ely Abarra nga ang nasambit nga hilikuton nga ginatawag KBP-DILG Broadcastreeing Project ang pagahiwaton sa bug-os nga pungsod sa Sabado, Oktubre 13.
Suno sa iya nga ang nasambit ng proyekto ang igapatigayon diri sa probinsya sang Capiz sa ika-duha na ka tuig katuwang ang Department of the Interior and Local Government.
Sa sini nga tuig, suno pa kay Abarra, mangin kaupod sa pagpananum sang bakhaw sa suba sang Cadimahan sa Syudad sang Roxas ang mga empleyado sang DILG, Department of Environment and Natural Resources, Philippine Information Agency, Provincial Press Bureau, Provincial Disaster Risk Reduction and Management Office, Roxas City Press Bureau, Capiz Association of Government Public Information Officers, Bureau of Fire Protection kag madamo pa nga iban.
Ginpaathag man ni Abarra nga tinutuyo sang amo nga proyekto nga ma ingganyo pa gid ang mga pumoluyo sa pagpananum sang kahoy bilang isa ka pamaagi nga maproteksyonan ang kalibutan kag mapahagan-hagan ang epekto sang kalamidad dala sang pagbag-o sang klima.
Pinaagi sa pagtanum sang bakhaw, maproteksyonan man ang kiliron sang suba batuk sa pagdul-os sini lakip na ang paghatag proteksyon sa ilistaran sang mga isda.
Nahibaluan nga sang nagligad nga tuig, kapin sa 3 mil ka puno sang bakhaw ang gintanum man sang mga katapu sang KBP diri sa Capiz.
Ang pagpananum sang kahoy kag bakhaw ang santo sa National Greening Program nga isa sa prayoridad nga proyekto ni Pangulong Benigno S. Aquino III, sa diin, tinutuyo sini nga makatanum sang 1.5 bilyones nga kahoy sa 1.5 milyones ka ektariya nga duta humalin 2011 tubtub tuig 2016.(JSC/JBG-PIA6 Capiz)
Martes, Oktubre 9, 2012
Mag-subscribe sa:
I-post ang Mga Komento (Atom)
