SYUDAD SANG ROXAS, Capiz, Oktubre 23 (PIA6) – Labi pa nga ginpasangkad ang ihibalo kag kinaadman sang mga empleyado sang Department of Agrarian Reform diri sa Capiz pinaagi sa pagpatigayon sang ensayo sa dapat himuon sa tion sang sunog kag linog.
Ginpahayag ni Capiz DAR Provincial head Ma. Teresa Valencia nga ang pagkahanda ang kinahanglanon sang tagsa tagsa agud mapahagan-hagan ukon mapaiway man ang malala nga epekto sang kalamidad.
Pinaagi sa fire kag earthquake drill nga ginpatigayon sa ila talatapan suno kay Valencia, mangin alerto ang ila mga empleyado nga dapat man ipahibalo kag itudlo sang mga ini sa ila tagsa ka katapo sang ila mga panimalay.
Suno man sa iya nga ang amo nga hilikuton ang nalakip na sa ila regular nga programa tagsa ka tuig para labi sila nga mahanas kag mangin handa sa tion sang kalamidad lakip na ila mahibaluan ang ila mga kakulangan agud masabat sa gilayon ang mga ini.
Ginpasalamatan man ni Valencia ang Provincial Disaster Risk Reducation and Management Council pinaagi sa action office sini bangud sa pagpanikasog nga matigayon ang amo nga orientation kag drill.
Pila ka mga tiglawas sang ahensya nga nag serbe nge evaluator sa ginpatigayon nga drill ang gikan sa Philippine Volcanology and Seismology, Bureau of Fire Protection, Philippine Atmospheric Geophysical Astronomical Administration, Department of the Interior and Local Government, Philippine National Police, Philippine Red Cross, Department of Public Works and Highways, Philippine Information Agency kag mga volunteer groups.
Ang pagpatigayon sang earthquake kag fire drill ang santo sa Republic Act 10121 ukon ang Philippine Disaster Risk Reduction and Management Act of 2010 nga nagatuyo nga mangin handa sa ano man nga kalamidad ang mga pumoluyo.(JSC/Jemin B. Guillermo/PIA6-Capiz)
