SYUDAD SANG ROXAS, Capiz, Oktubre 26 (PIA6) -- Handa na ang Probinsya kaupod ang iban pa nga mga talatapan kag grupo sa pagpanagbalay sang ika-lima ka tuig nga Western Visayas AIDS Congress.
Ginpahayag ni Provincial Health Medical Specialist Dr. Evelyn Bolido nga ang ila talatapan kaupod ang Roxas City Health Office kag ang grupo sang Capiz Shells ang preparado na para sa palaabuton nga kahiwatan sa Oktubre 29 tubtub 31 diri sa Syudad sang Roxas.
Suno kay Bolido nga ang amo nga pagtililipon ang pagapasakupan sang kapin 200 ka mga health workers kag people living with HIV gikan sa mga probinsya sa bug-os nga Rehiyon 6, sa diin, mangin dinapit nga taghambal si Assistant Secretary Pauline Jean Ubial sang Department of Health.
Ang nasambit nga Congress ang magasugod sa isa ka motorcade sa mga mayor nga dalanon sa Syudad sang Roxas sa hapon sang Oktubre 29 kag pagasundan sang pagbukas nga programa kag plenary.
Tinutuyo sang amo nga hilikuton, suno pa kay Bolido, nga mapadayon kag mangin tayuyon ang mga programa, serbisyo kag inisyatibo sang nagkalain-lain nga mga ahensya lokal kag nasyonal lakip na sang mga pribado nga grupo para sa kaayuhan sang kampanya para mapaiway ang HIV kag mabuligan kag masupurtahan ang mga persona nga may ari sini nga sakit.
Suno pa sa iya nga pinaagi man sini, mahatagan sang nagakaigo nga ihibalo ang publiko angot sa amo nga sakit kag masabat ang nagkalain-lain nga isyu nga nagapalibot diri.
Sanday Governor Victor Tanco kag Roxas City vice mayor Ronnie Dadivas nga magatiglawas kay Mayor Angel Alan Celino ang maga abi-abi sa mga delegasyon gikan sa nagkalain-lain nga mga probinsya sa rehiyon. (JSC/Jemin B. Guillermo-PIA6 Capiz)
Biyernes, Oktubre 26, 2012
Mag-subscribe sa:
I-post ang Mga Komento (Atom)
