BJMP nagpanawagan sa publiko nga mangin katuwang sa pagpaayo sang mga priso

SYUDAD SANG ROXAS, Capiz, Pebrero 19 (PIA6) – Ginpanawagan sang Bureau of Jail Management and Penology ang publiko nga mangin katuwang sa pagbag-o kag pag-uswag sang mga priso.

Suno kay Roxas City BJMP Warden Jairus Anthony Dogelio nga daku ang papel sang mga pamilya sang tagsa ka priso lakip na ang kumonidad sa pagbag-o kag pagpaayo sang kabuhi sang mga ini agud mangin produktibo nga mga katapu sang sosyedad.

Suno sa iya nga indi tanan nga mga napriso ang malain apang mahimo nga bangud sa mga sirkumstansya natulod sila sa paghimo sang krimen.

Gin-apela man ni Dogelio sa publiko ang paghangop sa baylo sang diskriminasyon para sa mga ini .

Ginpaathag man niya nga kabahin sang ila mga hilikuton sa BJMP sa karon ang pagtudlo sa mga priso sang ihibalo kag teknolohiya kag paghatag sang pangabuhian subong sang pag-obra sang hollow blocks, kandila, handicraft kag wood craft nga nagadugang kita para igahatag sang mga ini sa ila tagsa ka pamilya.

Bilang suporta man sa ordinansa sang Syudad sang Roxas nga nagadumili sa paggamit sang plastic, magahimo man sila sang mga paper bag ukon supot para man sa ila dugang nga kita kag pangabuhian.

Maluwas sini, padayon man ang pagpatigayon sang ila mga hilikuton subong sang regular nga pag-ehersisyo, pagtuon, paralegal nga serbisyo sang BJMP para sa ila mga priso nga may ara pa nga naka-pending nga kaso, kag madamo pa nga iban.

Sining karon lang, suno man kay Dogelio, kapin sa 68 ka mga nakahunong sa ila prisohan ang natigayon nga makaparehistro para makaboto sa palaabuton nga piniliay.

Sa karon, ang Roxas City BJMP ang may ara nga 134 ka mga priso, 128 sang mga ini ang lalaki kag anom naman ang mga babaye. (JSC/JBG-PIA6 Capiz)