SYUDAD SANG ROXAS, Capiz, Oktubre 22 (PIA6) -- Ginapatigayon diri sa probinsya sang Capiz ang isa ka survey agud mahibaluan ang pamatasan sang mga pumoluyo sa pag report sa mga otoridad sang nagakatabo nga kriminalidad.
Ginpahayag ni National Statistics Office provincial head Frankie Dordas nga ang Crime Victimization Survey (CVS) ang ginapatigayon sang ila talatapan agud makuha ang datus sa mga sahi sang krimen nga gina report sa otoridad.
Kapin sa 400 ka mga sample nga panimalay sa 23 ka mga barangay sa bug-os nga probinsya ang napilian para sa pagsabat sang mga palamangkutanon.
Suno man kay Dordas nga ang mga tagsabat sa amo nga mga palamangkutanon ang nagalakip sa indi magnubo sa 15 ka tuig ang edad nga katapu sang panimalay kag nangin biktima sang krimen sa nakaligad nga lima ka tuig.
Ginpaathag man niya nga ang makuha diri nga datus ang mangin balasihan sa paghimo sang mga tikang sang nasyonal nga pamunuan agud mapasangkad pa ang kampanya kag mga tikang kontra kriminalidad, proteksyon sa mga pumoluyo kag iban pa nga mga tikang para sa kaayuhan sang bug-os nga kumonidad.
Ang amo nga survey ang ginaptigayon sa bulig man sang Department of National Defense, National Police Commission, National Statistical Coordination Board, nga may bulig teknikal gikan sa mga consultant sang United Office of Drugs and Crime.
Suno pa kay Dordas nga kalakip sa CVS ang pagpatigayon man sang Labor Force Survey kag 2012 Survey on Overseas Filipinos. (JSC/Jemin B. Guillermo-PIA6 Capiz)
Lunes, Oktubre 22, 2012
Mag-subscribe sa:
I-post ang Mga Komento (Atom)
