SYUDAD SANG ROXAS, Capiz, Oktubre 4 (PIA6) – Ginnpanugyan sang mga doktor ang pagpaiway sang mga maalat, matam-is kag ma protina nga mga pagkaon lakip na ang tama nga pagpaninlo sa lawas agud mapaiway ang sakit sa bato.
Ginpahayag ni Dr. Rene Blancaver, espesyalista sa kidney diri sa Capiz, nga kinahanglan man ang regular nga pagpa check up kag pagpaidalum sa urinalysis kag pagmonitor sang presyon sang dugo agud malikawan ang sakit sa bato ukon renal disease.
Suno pa kay Blancaver nga kinahangalon man ang pag-inom sang walo tubtob 12 ka baso sang tubi adlaw-adlaw kag pagpaiway sa pagkaon sang mga isda nga wala sang himbis lakip na ang mga panginhason bangud may mataas ini nga uric acid lakip na ang pagkaon lamang sang karne isa ka bes kada semana.
Ginpahayag naman ni Capiz Provincial Health Office Medical Specialist Dr. Evelyn Bolido nga pinaagi sa programa nga Renal Disease Control Program (REDCOP) sang Department of Health, padayon ang ila masangkaron nga paghiwat sang mga pulong-pulong kag lecture sa mga buluthuan kag kabarangayan sa pagpaathag sang mga nagakadapat himuon agud mahalungan ang ila kidney ukon bato.
Suno man kay Bolido nga lakip man sa amo nga programa ang pagkolekta sang ihi sang mga kabataan sa Grade I agud ipaidalom sa urinalysis.
Ginpahayag ni Bolido nga sang tuig 2011, kapin sa 72 ka mga Capiceño ang nagkalamatay bangud sa sakit sa bato.
Suno pa sa iya, ang sakit sa bato ang ika-10 sa mga nagapanguna nga kabangdanan sa pagkalamatay diri sa Capiz, samtang ang Urinary Tract Infection (UTI) amo ang ika-pito nga sahi sang sakit kag ika-napulo man nga sakit sang mga kabataan nga indi pa maglab-ot sa lima ka tuig ang edad. (JSC/Jemin B. Guillermo/PIA6-Capiz)
Huwebes, Oktubre 4, 2012
Mag-subscribe sa:
I-post ang Mga Komento (Atom)
