2,400 magakuha sang pasinawan para makasulod sa pagka soldado

SYUDAD SANG ROXAS, Capiz, Septyembre. 21 (PIA6) – Masobra 2,400 ang natalana nga magakuha sang pasinawan sa bulan sang Oktubre para mangin katapo sang Philippine Army. Suno kay Public Affairs Office head Enrico Gil Ileto sang 3rd Infantry Division sang Philippine Army nga madamo ang magakuha sang aptitude test nga igapahamtang sa lima ka mga recruitment testing center sa Western Visayas lakip na sa Syudad sang Dumaguete sa Negros Oriental. Suno pa kay Ileto nga diri sa Capiz, pagapatigayunon ang amo nga pasinawan sa Camp General Macario Peralta sa Jamindan, Capiz sa Oktubre 1 tubtob 2 kag sa Capiz State University-Dayao campus sa Oktubre 3. Patigayunon man ang amo nga pasinawan sa Western Institute of Technology sa Iloilo sa Oktubre 4 kag 5, sa West Negros University, Bacolod City naman sa Oktubre 6 kag sa Negros State College of Agriculture sa Sipalay City, Negros Occidental sa Oktubre 7. Samtang ang pasinawan sa Negros Oriental State University sa Dumaguete City ang natalana sa Oktubre 8. Ginpahayag naman ni 3ID Commanding General Jose Mabanta Jr. nga pinaagi sa paghiwat sang pasinawan, labi nga makapili ang pungsod sang pinakamaayo nga soldado nga maga amlig sa mga kinamatarung, kabuhi kag propedad snag mga pumoluyo kag magadala sang progreso sa pungsod. (JSC/Jemin B. Guillermo/PIA6-Capiz)